|
蕭正楠說，他其實很怕醜。
學生時代，要他上台演講、話劇演出、落場打波，他通通避之則吉。莫說大庭廣眾公開獻唱，就算只是幾人開房唱ｋ，他也要硬拉表弟陪唱先得。
老實講，訪問時對足蕭正楠三小時，前看、後看、橫看、豎看，說他要怕醜怎說也不似。
而且，如果讀者不善忘，應該還記得年頭他上「ＴＶＢ」勁歌頒獎禮奪得新人獎時，那個咬牙切齒的肉緊表情，還有那啜核的一句：「邪不能勝正！」說是開心興奮，不如說他是意氣風發就更似。
太重視得失？「唔係一定要嬴，但唔想輸囉！」蕭正楠說。謎底一句揭盅，話是怕醜，其實是怕出醜，真正學名應該叫：「衰唔起」。所以，蕭正楠從來拒賭博，因為輸了會很介意。但如今入了娛樂圈，投身最大的賭博場── 一個更易輸、更易出醜的地方。
衰唔起，又唔甘心放棄，惟有自己同自己打打氣！
從未輸過
我細個時，唔知點解已經好怕醜，記得１３，１４歲卡拉ｏｋ，初時連咪都唔敢掂，俾人迫先肯唱歌，而且重要捉住表弟陪住唱，做我和音，先勉強完成ｏ個首當年黎明ｈｉｔ爆金曲〈傻痴痴〉。唱完真係感覺好開心，好似終於搵到個地方表現到嘞，我諗所謂既表演慾就係這個時候培養。
重記得爸爸以前都一樣好鍾意唱歌，咩〈相思風雨中〉、〈鴛鴦蝴蝶夢〉，唱得重幾難聽添，ｏ個時會勸阿爸：「唔好唱啦，好醜怪呀！」就算係屋企人表演，都覺得冇面會出醜嘛！係咪衰唔起、怕冇面？我諗呢個性格由到大都係，就算依家平常玩遊戲，輸左要罰，我都唔想輸。同同事玩「七級豬」，我從來未輸過，唔係特別醒，只係我會特別認真，集中全副精神入去，為求唔輸，玩ｏ個時一句野都唔講，咁就肯定自己唔會受到變態既懲罰，而出醜於人前。
最怕丟臉
入行時，怕瘀怕「𤓓」既性格依然冇改，ｏ個時啱啱出道無人識，出席公開活動，同場重有好多歌星、藝人ｏ係度，自己好似唔關事咁企埋一邊，ｏ個種被冷落既感覺，對於我其實幾難受。
事後都要由同事作心理輔導，解釋清楚：「做新人喎，你想點啫？人地個個走黎影你好唔好？」聽完個心先舒服返ｄ。記得入行後最最最唔開心既一次，係要到一處「奇怪」既地方唱歌。ｏ個時又係初出道，要去ｄ品流幾雜既Ｄｉｓｃｏ表演，人地ｏ係舞池跳舞，我就ｏ係台上唱慢歌。當時都好驚會有反效果，驚俾班客人叫：「唱咩呀？」、「收聲啦！」、「走啦！」呢類羞辱性說話，但你接左都要硬著頭皮頂硬上，最終佢有佢地跳，我有我自己唱，唱完又無咩反應，不過都好彩啦，寧願冇反應好過壞反應啦！
到依家我都仍然有ｄ怕，希望公司ｏ係接騷之前可以查清楚，有ｄ騷要著ｄ奇形怪狀既衫既就盡量唔好。我知道道理係：「有野唔通唔做？有錢唔通唔賺呀？」但係盡可能都希望ｏ係開心、舒服既環境下做。辛苦我唔介意，但潮州話叫「丟臉」，我最怕就係出醜！
難信朋友
我個人其實都好保障自己，曾經被人出賣過，依家同人做朋友都唔會１００％信晒人。以前讀書ｏ個時會好蠢，同人做朋友咩都講晒俾人知，結果就自己蝕底，對住我係朋友，背住我就勁唱我。
雖然諗番都係雞毛蒜皮既野，但係都唔明點解有人會咁假？自己讀書時冇咩值得人出賣啫，又唔係為錢又唔係為咩？娛樂圈咁複雜，就更加唔可以唔小心嘞！我都好想ｏ係圈中搵到ｄ真心朋友，同余文樂都ｏｋ架，幾好傾丫，一齊做野傾下，講下，嘻嘻哈哈，但係要深入ｄ嗎？應該有掛都未可以做到知心友。
某程度入左行就唔可以唔保護自己，除左家人，我都唔會放心信晒一個人，話就話今日係朋友啫，點知聽日仲係唔係架？不過，最起碼依家已經一步步慢慢黎，以前見到唔講野，到依家ｆｒｉｅｎｄ左少少，下一步就俾時間囉，睇清楚值得做朋友既我都想交心，咁就唔會覺得孤身ｏ係娛樂圈咁ｌｏｎｅｌｙ啦！
非人生活
入行至今大半年，到目前心態重係好迷惘，究竟點樣先為之一個成功既藝人呢？
今日好成功，聽日已經唔見左，例子多到１０隻手指數唔晒，只係講錯一句說話、做錯一件事就可以ｏ係呢個圈消失。你話做新聞上頭條好？但係入半年，如果就搞咁多新聞谷到咁行，咁之後唔通要搞更大既新聞先會更紅？如果要特登搞ｄ新聞，例如同某君扮ｆｒｉｅｎｄ，跟住又同人起衝突，藉此黎攞多見報，咁樣好肉酸，呢ｄ我唔做。
再者，而家我２５歲就黎２６啦，弊就弊在我已經冇時間去攞教訓。人地２０歲入行，就算犯錯，俾人由唔鍾意去番鍾意，縱使經歷３、４年時間，都唔及我而家既年紀，但如果要我依家嘗試跌下撞下，唔通機會重會等我等到２８、２９歲先再黎？所以，既然公司同我都揀左呢條路去行，儘管係非人生活，我都絕無怨言，做十幾個鐘不停做。若果杙再有進步，咪唔訓再聽下歌、睇下戲囉，吸收下人地既野，點樣辛苦我都唔介意。
爭櫈仔
去年，又親眼目睹一場娛樂圈的爭櫈仔遊戲，參賽者有蕭正楠、余文樂、ｊｕｎｏ，還有其他．．．．講唔出名。娛樂圈爭上位，同爭櫈仔遊戲過程其實相類似，蕭正楠說：「坐緊既人未行開，都幾難坐上去，除非好叻好醒！」
第一回合，蕭正楠總算佔上一個席位，之後？
訪問期間，記者為了打破納悶氣氛，邊調笑邊與蕭正楠做訪問，心諗大家年輕人嘛，估唔到他卻突然正經八百度：「點架？你係笑我定點架？」娛樂圈似爭櫈仔，不外乎一場遊戲，一場遊戲，但蕭正楠上場次次帶埋護踭、護膝、盔甲、盾牌，身負千斤重，行得「嚤」，冇鼻哥，櫈仔又唔多………
|
