蕭正楠、陳文媛　因拍劇而了解 --  Tvb周刊  2003.07.01

 

 陳文媛（Bo Bo）與蕭正楠（Edwin）同是樂壇中人，但甚少有見面機會，大家互覺對方很cool更有點「寸」，拍攝《戀愛自由式》（暫名）令二人的誤解一掃而空，更玩埋一堆，做了朋友。

 點解要拉我落水？

 Ｅ：當初由模特兒轉做歌手，有無擔心過？
 Ｂ：有。
 Ｅ：入左行咁耐，對演藝圈有咩感覺？
 Ｂ：好多辛酸，好多不為人知既野。
 Ｅ：遇到咁多辛酸值唔值得？
 Ｂ：值得！其實唔可以話值唔值得既，因為自己揀左做歌手、演員作為事業，就要努力去做，唔可以話玩吓、試下。
 Ｅ：妳覺得自己面對問題既能力ＯＫ嗎？
 Ｂ：Ｓｏ　ｆａｒ都ｏｋ！
 Ｅ：有無試過好唔開心？
 Ｂ：梗係有啦！
 Ｅ：同我一樣咯！
 Ｂ：喂！你有幾唔開心？我覺得你有好多野都未試過啫！
 Ｅ：妳出道幸福過我！我出道O個陣既競爭大過妳！
 Ｂ：你講吖！
 Ｅ：我今年幾多新人吖！
 Ｂ：你O個年有９個人既COOKIES，先令你覺得人多啫，但我O個年單頭新人多過妳吔，計埋有成２０多個單位，係人數多Ｄ啫！
 Ｅ：都算多架！好似Ｆ４分散左去角逐新人變啦！唔講人數，妳O個年有無咁多不和是非？
 Ｂ：咁又真係無咁多是非。
 Ｅ：我一出道，乜都唔識就要面對Ｄ唔關自己事既是非。點解要拉我落水啫！係都要搞咁多不和新聞，等大家見面尷尬？
 Ｂ：睇吓你點處理啫！
 Ｅ：我年紀比其他新人，大應該要成熟Ｄ去處理問題，唔通下下都問「喂！有冇搞錯，點解咁講架？」會唔會因為我所屬公司係新成立而且我係第一個藝人，所以成為是非目標之一。
 Ｂ：我夠係囉！我同你個ｃａｓｅ一樣，我係ｓｔａｒｅａｓｔ第一個藝人。
 Ｅ：咁我地都好似，到底妳遇到Ｄ咩唔開心？
 Ｂ：我有好多野唔開心！
 Ｅ：緋聞？
 Ｂ：唔係！我覺得緋聞係好小事！

 兩人互怕相處不來

（Edwin突然話題一轉）
 Ｅ：平時有咩消遣？
 Ｂ：嘩！轉得咁快！平時無咩消遣，好慘架！你唔覺我地好少機會出街咩？出到街唔知做咩！
 Ｅ：咁又真，一個人行街好似好尷尬，我一出道就不斷做野，冇乜點放假。試過有一次有一日假，但係『吽』O係屋企唔知做Ｄ咩？
 Ｂ：我做新人O個年，日日唔係影相，做訪問就係錄音、開會，總之好忙，到左第二年開胎要去為事業打穩基礎，都幾辛苦架！你相對地好Ｄ，第二年做新人可以拍劇。
 Ｅ：今次拍劇拍得好開心！大家好俾心機去拍。初初知要同妳合作，我真係驚夾唔到，因為我覺得你有d cool架！而且入行以來冇撞過妳，又唔識妳喎！真係擔心！但相處落又ok噃！
 Ｂ：我開頭覺得你好靜，幾公子，仲有少少「寸寸地」，合作過後感覺唔同左，覺得你做野好認真之餘，幾鍾意玩。
 Ｅ：唔止怕同妳夾唔到，我有擔心過同其他演員合作唔到，大家都唔認識對方，不過經過日夕相處，可以更認識對方，一班年青人相處得好開心，大家都鍾意音樂嘛。
 Ｂ：其實第一次拍劇覺得點呀？
 Ｅ：開頭唔係好慣，聽聞拍劇好辛苦，原來真係喎！
 Ｂ：後黎覺得點？
 Ｅ：拍耐左，順左又唔覺得好緊張，開始時要去習慣環境梗係會麻煩Ｄ。我覺得後期做得比前期好，同一班演員越黎越熟，培養左一份默契！而且學到做戲既竅門，你有咩難忘事？
 Ｂ：比我想像中快咯！大家不經不覺就拍左兩個幾月，各人有傾有講，唔會一返工就埋頭做野，大家傾 下講下，時間過得好快。
 Ｅ：其實工作人員話拍兩個月唔算快，但我都覺得時間過得好快，好快尾廠，拍完外景。
 Ｂ：今次我仲識多左一班不同工作範圍既朋友添！
 Ｅ：就算大家係歌手，雖然日日見面，但可以坐低傾偈既機會好少，反而拍劇大家成日一齊食飯，多左傾偈既機會。
 Ｂ：我都覺得係。
 Ｅ：我依家會同黃宗澤，揚明一齊出黎打波架！

 難忘掟人落水

 Ｂ：仲有咩難忘？
 Ｅ：好多架！好似掟人落水！
 Ｂ：你成日掟人落水，好悶呀！
 Ｅ：係宗澤撩人掟人落水架！
 Ｂ：你一有泳池戲，自己著左泳衣就掟人落水，因為唔怕被人反掟落水。
 Ｅ：我由頭到尾未俾人掟過落水，係都係我自己跳啫！
 Ｂ：因為係你發起既！
 Ｅ：都話唔係咯！除左掟人落水，跳海戲都好難忘，明明話你救我，點知拍o個時一cut機就係我救返妳轉頭。
 Ｂ：因為你著左會浮既救生衣，淨係浮水，點似我咁辛苦。
 Ｅ：最辛苦係你囉！
 Ｂ：我o個件衫浸左水變得好重，而你又浮水浮得咁輕鬆，我梗係where住你啦！
 Ｅ：仲有我地唔駛埋位就猜野！猜輸左就要罰請食野。
 Ｂ：平時等埋位會猜既，或者有邊個需要食野、飲野就會猜。其實你會唔會再拍劇？但要拍古裝喎！
 Ｅ：都會拍架！但最好o係冬天。
 Ｂ：如果o係夏天拍呢？而且劇本好好喎？
 Ｅ：好成點？如果金庸小說劇集都肯架！
 Ｂ：但係夏天喎！成３２度噃？
 Ｅ：可以保證係好既，我都會拍架！
 Ｂ：邊有得保證，你講晒啦！
 Ｅ：搵得我拍都應該係好既！（哈哈哈）

 以平常心去應付

 Ｂ：拍劇時咪傳出我同你不和既是非，我既睇法係Ｄ周刊話題過左一星期就無啦！另一個星期有新話題，好快就唔記得，而你好勞氣！
 Ｅ：我真係勞氣架！覺得無厘頭丫嘛！成日將Ｄ無關痛癢、無聊既事放大黎講。
 Ｂ：做我地呢行唔會信雜誌報紙寫既野。
 Ｅ：我知，我唔識點去handle呢Ｄ報道，如果我做錯事，俾人地寫都天公地道，因為食得鹹魚抵得渴。但毫無根據腌咁寫既負面野，我就覺得好難應付，最慘有Ｄ朋友睇完走黎問我係咪真，令我覺得好唔開心。
 Ｂ：我覺得無架！讀者都好聰明，大家睇完就算。如果佢地都冇辦法啦！明白就明白，唔明就算啦！
 Ｅ：我唔明Ｄ報紙周刊既做法，夾硬要寫衰晒所有藝人先令佢地銷量好Ｄ，有一日佢地寫死晒Ｄ藝人，仲可以寫Ｄ咩？
 Ｂ：唔駛咁勞氣！由得佢地囉！你無辦法控制到，以平常心對待，如果次次咁嬲，嬲得幾多吖！如果諗住o係呢行做耐ｄ，就要睇開ｄ！
 Ｅ：我地做野壓力好大，好辛苦，如果出左一隻做得唔係咁好既碟，可能冇機會出下一隻，所以每隻碟都好俾心機去做，而且除左唱歌，仲要拍電影、電視、廣告、訪問，一個人兼顧咁多野，仲久唔久俾ｄ雜誌轟炸，真係好人都癲！
 Ｂ：你覺唔覺得做呢行會令人變得脾氣大左？
 Ｅ：我唔覺，反而我Ｄ脾氣收歛左，以前有Ｄ咩唔開心都會爆晒出黎，唔岩就鬧，依家會三思而後行，諗清楚先做。

 跑步練氣有效

 Ｂ：拍完劇，我同你都會做番唱片工作，你黎緊出ＥＰ定大碟？
 Ｅ：大碟！會做以前唔同既音樂品種，好似跳舞快歌，做Ｄ中版慢歌。
 Ｂ：你覺唔覺得一向唔跳開舞既歌手去唱快歌會好難，難既唔係記舞步，係要跳得純熟，跳得好好係好難！
 Ｅ：係吖！一路跳舞一路唱歌真係要練氣，所以我覺得戴住ＭＤ機邊跑步邊唱歌去練氣幾有幫助。咁妳唱片工作又點？
 Ｂ：會做Ｄ唔同既野，一切都仲傾緊，希望到時會有唔同既帶俾觀眾呢！
　

back