「新人王」蕭正楠（Edwin）的處男EP碟《眼光獨到》面世不夠兩個星期，即被盜版商睇中，記者在廣州發現其盜版碟的蹤跡，而且諷刺地將Edwin與「環球唱片公司」拉埋一齊，把張國榮和黃耀明的合唱碟《CrossOver》內所有歌曲，一併「收錄」在Edwin這張盜版碟裡。似乎「環球」要與Edwin真正劃清界線並非易事
。陳少寶：我管唔到
記者致電「環球」高層陳少寶，他一聽到「蕭正楠」三個字就立即顯得非常不耐煩說：「我唔要講呢個人，唔會提呢三個字。（你覺唔覺得當初因為你強烈批評Edwin，又話唔准你公司嘅歌手同佢合照，以致盜版商有機可乘，借題發揮？）我唔知喎，話明係盜版，鍾意點『拼』咪點『拼』囉，我管唔到！（有人盜版你公司嘅唱片，你唔打算做啲嘢阻止咩？）我唔得閒，總之我冇回應。」斷然掛線
。 唱片公司展開調查
Edwin坦言早知自己的新碟被盜版，在廣州「發行」，他表示其唱片公司MusicNation已徹查，他憤怒地說：「嘥晒我同製作部成擔心血。其實唱片未出之前，我已收到大陸歌迷嘅信，讚我嘅新歌，但根本那首歌未開始派台，事有『蹺蹊』，公司已開始調查，我一直唔敢講，係唔想打草驚蛇，亦唔想為張盜版碟宣傳。」但Edwin則不認為陳少寶的說話令盜版商借題發揮，他說：「如果真係為咗夾新聞，不如將我、麥浚龍和余文樂『三拼』啦！
」
|
