電影《六樓后座》下月四日才正式上映，但已經是非不絕，先傳因麥浚龍（Juno）主唱電影插曲，惹來戲份較多的蕭正楠不滿。昨日又傳唱片公司因不滿蕭正楠詐型一事見報，致電電影公司投訴之餘，蕭正楠更不會出席宣傳活動作抗議
。電影公司原定下周五（二十三日）安排《六樓后座》眾演員錄影《勁歌金曲》，讓節目與電影在下月四日同步出街，除周浚偉因身在台灣不能出席外，所有《六》片演員包括林嘉欣、盧巧音、蘇永康、麥浚龍（Juno）、鄧健泓、周永恆和商台DJ森美等都會現身，惟獨蕭正楠拒絕參與錄影
。
星皓責不合作：唔上《勁歌》係佢損失！
有指蕭正楠其實在拍攝《六》片期間，已與其他演員鬧得不太愉快。星皓電影公司發言人陸小姐昨日接受電話訪問時，直指蕭正楠不合作，她說：「由頭到尾我地都唔知蕭正楠會唔去《勁歌》，如果佢連《勁歌》都推，咁我地真係覺得好唔啱，所有演員當日都會上節目，所有人都好合作，蘇永康特登由台灣返黎，盧巧音雖然忙緊佢既演唱會，但都接受無綫派攝製隊去紅館拍花絮。今次亦都係林嘉欣第一次上《勁歌》，我覺得蕭正楠唔上《勁歌》，係佢既損失大d。
」
陸小姐又說：「Juno戲份係唔多，搵佢唱插曲係因為咁啱配合番場戲，絕對唔係話蕭正楠唔好，事實上蕭正楠o係套戲入面好出色，以一個新人黎講，佢做得好好。我唔知蕭正楠唱片公司有冇打電話黎詐型，公司有咁多人，唔知佢地打去邊度。
」
蕭正楠話冇期：電影公司搞埋d古靈精
怪野！
而蕭正楠所屬的musicnation唱片公司發言人鄭小姐，昨日則在電話中回應說：「蕭正楠唔上《勁歌》，唔係因為不滿Juno唱插曲，亦唔係因為有咁既新聞見報，我地早o係兩個禮拜前已經推左。」但為何星皓方面表示不知道此事？鄭小姐說：「我地一早同電影製片夾好晒，兩個禮拜前我地已經通知左製片，有兩個加州紅既宣傳去唔到，《勁歌》亦去唔到，其他可以做到既我地會盡量安排。電影公司想做宣傳我地絕對理解，但佢地好混亂，依家又搞埋d古靈精怪野
。
「蕭正楠唔係唔肯做，而係佢同無綫拍緊電視劇《戀愛自由式》，幾乎四、五月既期都畀晒無綫，套劇依家趕緊，蕭正楠又點抽到時間出黎呢？林嘉欣第一次上《勁歌》，蕭正楠一定會默默支持，如果佢當日o係電視城既話，或者會o係廠度撞到呢？
」
Juno氣定神閒：三個禮拜前已度好晒期！
鄭小姐又說：「總之蕭正楠冇因為唱主題曲或者插曲既問題唔開心，公司同佢一樣，都尊重電影公司既安排，而且套戲咁多歌星，蘇永康、盧巧音都係佢前輩，機會唔到佢，亦都唔會嬲。我今日係打過電話去電影公司，但唔係詐型，只係了解件事。蕭正楠拍呢套戲冇唔開心既野發生，相反重有得著，佢因為拍呢套戲同盧巧音熟左，重會做演唱會既嘉賓。
」
至於身為是非導火線的Juno，其經理人公司發言人昨日接受電話訪問時說：「Juno會上《勁歌》配合電影宣傳，三個禮拜前已經度好晒期，至於其他人去唔去到，我地唔知。
|
